هاودەنگ میدیا
مەسرور بارزانی، جێگری سەرۆکی پارتی دیموکراتی کوردستان لە کەرنەڤاڵی بانگەشی پارتی بۆ جەماوەر و لایەنگرانی پارتی لە زاخۆ ڕایگەیاند: ئەو كەسانەی هیچ دەستكەوتیان نەبێت، ئەو كەسەی هیچ بەرهەمی نەبێت، ئەو كەسەی فاشیل بێ و لە ئیدارەدانی بەشێك لەم وڵاتە سەركەوتوو نەبووبێت، ئەو كەسە چۆن داوای حوكمڕانیی لە بەشەكانی دیكەی كوردستان دەكات؟ كەسی فاشیل حوكمڕانی پێ ناكرێت، وەك سەرۆك بارزانی فەرمووی، خەڵكی زماندرێژ دەستی زۆر كورتە.
وتیشی: ئەو لایەنانەی وەفایان نەبووە بۆ تێكۆشەرانی خۆیان، وەفایان نەبووە بۆ قارەمانانی میللەتی ئێمە، وەفایان بۆ مێژووی نەتەوەیی و نیشتمانیی ئێمە نەبووە، ئەمڕۆ چۆن وەفایان بۆ ئێوە دەبێت؟ كەسێك وەفای بۆ برا و برادەری خۆی و ئەو كەسە نەبووە كە ئەوی هێناوەتە سەر دەسەڵات، چۆن وەفای بۆ كوردستان دەبێت؟ ئەو كەسەی دوێنێ كوردستانی فرۆشت، خاكی فرۆشت، ئەمڕۆ ئەم خاكەی پێ ناپارێزرێ.
